Friday, February 4, 2011
Tinjau pendiau serta pengidup: Rh Endawie Nanga Grenjang
Monday, February 1, 2010
Buah Engkabang
Thursday, January 14, 2010
Iban Warriors Under Rajah's Rule
Monday, January 11, 2010
Sempama Iban
Bansa Iban endang sigi tebilang engau adat, jaku, main asal enggau pengawa rama. Ambi ke banding, aki ini kitai kelia cukup pandai amat bejaku sereta landik amat ba penemu rama baka jalai beburung, bumai enggau pengawa bukai. Nyadi ke kelia utai tu endang sigi nadai ditulis ke ba bup dikena ngingat nya alai sida ke tuai menya mina nyabung penajam pengingat aja ke ditampung turun temurun. Nya alai tak salah amat munyi jaku seleka nyangka utai ke ditampung sida ke tuai nya tau lain sereta bebida ba batang ai siti-siti laban nya mina bemalin ke pengingat sida ke tuai aja ke lalu ditusui ngagai anak telesak ambi ke bisi dikenang dudi ari. Nya alai kitai ke rebak dudi tu patut amat bisi penyedar ke utai ti bansa tu. Beduduk ari kitai ke bisi sekula lalu nemu macha sereta nulis nya alai ngena amat enti utai ke baka tu bisi ditulis ke simpan lalu bisi ke bacha sida ke rebak dudi ila.
Beduduk ari penyedar nya tadi dia aku lalu nguji deka nulis ke utai ke mengga mit nya ba blog aku tu. Penemu aku sigi kurang, enda chukup mayuh enti disbanding ke enggau orang bukai tang laban dibai ati ke sayau ke bansa diri nya meh aku lalu nguji nulis ke utai tu. Utai ke deka dikenang aku diti iya nya siti ari pengaya jaku kitai bansa Iban iya nya sempama. Nyadi utai ke dikumbai sempama tu iya nya genteran jaku ke suah dikena kitai manding ke pengidup, pendiau enggau ulah kitai mensia. Utai ke alai manding ke nya baka jelu, utai tumbuh, gaya idup, enggau mayuh agi ti bukai.
Nya alai sebedau aku ngerintai ke sekeda sempama ke ditemu aku, dia aku enggai enda minta ampun ngagai bala mayuh nyangka sempama nya tadi bisi salah sereta enda ngena ba ati kita. Kita tau meri komen kita lalu madaah ke penyalah ngambi ke aku ulih ngemetul, nyeruri sereta nyeleti iya awak ke tau betul.
1. Baka pipit deka nelan leka embawang
- pipit tu sebengkah burung babas ke suah ditemu kitai ba umai, kebun lada, sereta temuda. Bulu burung pipit tu chelum lalu bisi ga banda lalu yak e banda nya lalu dikumbai pipit banda. Pemakai pipit iya nya padi.
-embawang tu sebansa buah babas. Enti iya agi mata buah ya masam tang enti udah mansau isi ya bebali nyadi kuning lalu manis diempa. Buah embawang tu besai lalu tau bulih sekilo pemerat sigi-sigi.
-reti sempama ke dikumbai orang tuai baka pipit deka nelan leka embawang tu iya nya dikena manding ke ulah orang ke deka ngereja pengawa ke enda ulih tangkup iya empu. Kira ke pengawa nya ending tetap enda ulih ditapi iya ketegal ari pengurang penemu, pengelandik tau ke pemandai iya.
-chunto ayat:
Balat ga Unggang nya tak ngumba-ngumba ka enggau orang kereje ke tasik, ukai nya nemu macha. Nyangka nya meh utai ke dikumbai orang ke tuai baka pipit deka nelan leka embawang.
2. baka ukui nengkadah linau
-kitai semua sama nemu jelu ke dikumbai ukui tu. Bisi sekeda ai nyebut iya uduk.
-utai ke dikumbai orang linau tu iya nya dagin jelu baka babi, kijang, enggau rusa ke disalai awak ke tan agi ditaruh.
-reti sempama tu iya nya dikena manding ke kitai mensia ke ngembuan pengingin ati ke utai siti-siti tang endang sigi nadai jalai tulih ke iya ketegal bida pangkat, pemandai sereta tingka derejat kitai. Ambi ke banding, tudah ukui mina tak nitik liur aja meda linau tang nadai jalai ulih makai nya laban ke ditaruh tinggi ba atas para.
Chunto ayat:
Pengeran ati Wat ke Jati sigi bendar tang laban tudah tuai orang seranta lalu sida Jati orang kaya nya alai sigi nadai jalai meh seduai iya ulih jadi ila. Sempama baka ukui nengkadah linau meh tudah Wat semina buya mata meda aja.
3. baka empeliau bedua iku
-empeliau tu sebengkah bansa jelu kampong ke siga. Kira sida tu sama species emnggau kera meh laban sida ke sama jelu jangkit. Diatu empeliau nyau nadai mayuh agi kaban nyau deka pupus. Nitih ke jerita tuai, kelia iku jelu empeliau tu panjai tang laban ke udah dibagi iya enggau jelu bukai nya lalu ngujung ke iku iya nadai sampai ke saritu.
-reti leka sempama tu iya nya dikena nyema ke orang ke kelalu manah ati tau ke murah ati (generous). Sida sanggup meri pemisi sida ke orang bukai ke beguna ke tulung tau ke bantu lalu nadai ngira diri rugi. Mimit sama dibagi mimit ga amat ga orang bukai sama bela ampit.
Chunto ayat:
Amat cukup manah ati Igat nya, semua sida serumah diberi ya injin api siti sepintu lalu nadai ngira diri rugi enda nyalah-nyalah baka empeliau bedua iku ku orang tuai.
Naka tu dulu kenang aku ke sekali tu ba senentang sempama kiatai Iban. Dudi ari ila ga aku nambah ke sekeda sempama bukai ke bisi ditemu aku. Nya alai aku sekali agi minta ampun enti nyema utai ke ditulis aku nya salah.
Tuesday, November 24, 2009
Saturday, October 31, 2009
JKKK rumah panjai dipinta numbuhka pan pelajar sekula
SRI AMAN: Bala sida kaban Komiti Pemansang enggau Pengelikun Pendiau (JKKK) ba semua rumah panjai di menua tu dipinta numbuhka pan ditagaka ungkup pelajar bala anak sida.Atur numbuh pan pelajar sekula nya endang sigi kena mantu dalam pekara belanja bala sida ari rumah panjai nya ke maju sereta mujur dalam pelajar sida lalu bulih penuduk alai nampung pelajar sida ba sebarang Institusi Pelajar Tinggi (IPT) di Menua kitai tu.
Kaban Kunsil Nengeri Bukit Begunan Mong Dagang ke mansut jaku nya madah, pekara tu besai bendar guna, laban endang sigi tuju ati semua apai indai deka meda anak sida pandai dalam sekula sereta ulih nampung pelajar sida ngagai tikas ke tinggi, bulih diploma, bulih degree.
“Enggau atur numbuhka pan pelajar sekula, iya ukai mina meri penguntung ngagai bala anak sida ba rumah panjai ke deka nampung pelajar sida tang mega meri penguntung ngagai rumah panjai kita enti sida nya udah mujur ila.
“Bala anak ke mujur beduduk ari kena sagu pan [elajar sekula ila deka ngemai ngagai menua kita pemansang enggau ubah ke manah ngagai rumah panjai kita lebuh sida udah mujur dalam pelajar sekula sida dudi hari ila,” ku iya,
Pekara tu dibantaika iya lebuh ke bejaku bejadika Pengerami Makai Lemai 2009 ke diatur ulih Komiti Pemansang enggau Pendiau (JKKK) Rumah Musa di Lutang,
Kampung Sutong, Sri Aman enggau kerajasama Sarakup Indu Dayak Sarawak (SIDS) Unit Kampung Sutong bertempat di Dewan Suarah ditu apin lama.
Nya alai tegal nya, iya minta semua bala kaban JKKK awakka sida muai ketisi penemu ke madah, mina bala anak sida ke mujur ba pelajar beruntung ari pan nya, laban pan nya mega meri penguntung ngagai semua orang ba genturung menua nya.
“Aku enggai enda ngansak bala kitai di rumah panjai awakka sida enda ngembuan penemu enggau runding bakanya laban anak enggau uchu-ichit sida iya ke deka begunaka pan pelajar nya dudi ila, laban kitai enda nemu sapa ke mujur bulih penuduk ba IPT dudi ila, enda nemu bala renggat anak tauka sida uchu.
“Sebarang sapa ke mujur, nya meh beruntung, tang ukai sida nya aja beruntung laban semua orang deka beruntung, laban enti bala anak ke pandai nya ila mujur dalam pengidup dudi hari, sida deka ngemai mayuh agi pemansang enggau penguntung ngagai genturung pendiau nya. Beduduk ari nya, semua deka beruntung, enda ngira sapa.
“Reti utai ke aku tu, pemujur bala anak kita ke ngena belanja ari pan pelajar nya ila sigi dikira kitai pemujur kitai bekunsi, lalu ukai mina nguntungka orang sepintu tauka dua pintu bilik aja tang enggi semua rayat ba rumah panjai nya,” ku iya nerang.
Nya alai enggau nya, Mong mega keran madah ngagai semua bala kaban JKKK dia enggau ba alai bukai di Menua tu anang enda beratka pelajar sekula bala anak sida.
Ku iya, endang sigi tanggung pengawa JKKK nerang ngagai bala kaban iya tentang pemesai reti meri pelajar sekula ke pemadu manah ngagai bala anak sida, kelimpah ari meri fokus ngagai agenda pemansang ke bukai.
“Serimbai kitai sama bela nyendia diri ngagai taun 2020 ila, bala anak kitai patut disikapka enggau mayuh bengkah penemu ke chukup laban enti nadai pelajar sekula ke chukup, sida deka tinggal di belakang dalam pelajar sekula menua tu,” ku iya nambah.
Mong madah, menua Malaysia tu beguna bendar ka raban ke pandai kena mantu dalam pemansang menua tu jemah ila lalu datai ba taun 2020 ila genap ruang bilik dikarapka abis nadai siku graduat.
“Enti nyema kitai enggai nyengula anak, enda meri awak sida besekula ngulihka pemandai, bakani gaya anak enggau uchu kitai datai ba taun 2020 ila?
“Sida tetap deka jauh tinggal di belakang, nadai nemu riap orang lalu enda ampit enggau orang sama gagit ngemansangka menua tu,” ku iya.
Sama bisi datai ba pengeraminya Chermin SIDS Pampang Sri Aman Roselyn Abunawas, Chermin Serakup Bansa Dayak Sarawak (SDNU) Pampang Sri Aman Roland Demong Radin, Pengulu Briku Busang, chermin- SIDS Unit Kampung Sutong Saloma Dris, bala ketuai opis perintah enggau ketuai raban bansa mega.
Ba pengerami nya Mong ngerah agih geran ari perintah RM4,000 ungkup taun 2010 ari Kaban Parlimen Sri Aman, Masir Kujat ngagai JKKK Rumah Musa Lutang ka tambah geran RM 3,0000 diagihka ngagai Biro Indu sida rumah panjai nya.
Nyadi iya empu, bisi agih RM3,000 ngagai JKKK Rumah Musa nya sereta enggau RM2,000 diungkupka ngagai Biro Indu sida rumah panjai nya.
Pengerami malam nya betambah richah rami agi enggau sekeda perindang lagu spunsa sereta enggau bantai ‘nyawa mas’ ari ketuai pengabang sereta enggau atur nyabut tikit benasit
Pesta Ai Sungai Krian di Saratok seharitu
SARATOK: Saratok sekali agi deka nyadi palan Pesta Ai Sungai Krian ke berengkah seharitu 31 Oktober ngagai 2 November tu.Ketuai Pelilih Saratok ke mega sapit chermin pengatur Daniel Supit madah, Pesta Ai Sungai Krian ke masuk ngagai edisi ke-7 taun tu, deka mantai mayuh atur enggau program nyengkaum lumba akit, lumba perau, nginti, main asal, lumba rayat enggau jual produk betanam betupi.
Ku iya, dalam taun komiti pengatur mega bisi mantai siti agi program baru iya nya ‘Festival Saratok’ ke deka bejalai sebulan lalu udah berengkah ari 2 Oktober tu tadi sampai ngagai 1 November tu.
Ba pesta ai nya ila, bisi mega pampay ke alai sekeda artis menua tu deka merindang belagu, karnival ketuai raban bansa, malam main asal, pekit nyumpit, mini ekspo dagang, pengayan pemansang, pekit bepangka (gasing), main bungai api enggau pak jual pemakai enggau utai irup.
Ku Daniel, Karnival Ketuai Raban Bansa Pelilih Saratok udah dipejadi Menteri Muda Betanam Betupi (Gerempung Orang Bumai enggau Koperasi) Datuk Peter Nyarok Enteri lalu pengerami nutup karnival udah ngambi Sapit Menteri Dalam Menua Jelaing Mersat kena 17 Oktober tu tadi nembuka pengawa nya.
Dalam taun tu bala pengatur agi mengkang ngena rambai jaku ti ngeringka penyerakup iya nya ‘Air Dicincang Tidak Akan Putus’.
Tuchung pengerami nya ila deka meda lumba perau baka sakai 10, 15, 20, 25 enggau 30 orang ngayuh lelaki enggau indu kena berebutka tropi Datuk Peter Nyarok Enteri, tropi Yang Berhormat Abdul Wahab Aziz enggau tropi Yang Berhormat Jelaing Mersat.
Sama disadang diatur mega lumba injin sepit enggau injin pam 5,10 enggau 15 kuasa kuda. Pengerami seharitu dipejadi Sapit Kepala Menteri ke mega Menteri Pemansang Pesisir ke mega Menteri Pemansang Infrastruktur enggau Komunikasi , Datuk Patinggi Tan Sri Alfred Jabu. Udah nya Menteri Muda Ngemoden Betanam Betupi (Gerempung Orang Bumai enggau Koperasi Datuk Peter Nyarok deka diberi basa nutup pengerami 2 Nov tu.