Friday, February 4, 2011

Tinjau pendiau serta pengidup: Rh Endawie Nanga Grenjang

Lebuh aku ke bisi kemisi ujung taun tu tadi aku bisi pulai ke menua kami di nanga grenjang kena pegai menua saratok. Rumah kami enda panjai lalu betuai ke Tr. Endawie anak Raik. Baka rumah panjai bukai ke di ulu ai mega rumah kami bedau datai karan tang bisi ai paip. Ngaga tekat (dam) kediri empu. Nya alai nadai bebayar ai. Nya ga penyamai. Bisi ga rita perintah deka meri karan sepemanjai jalai Ulu Krian lalu projek nya diperambu deka tembu sebedau 2012. Arap ke jampat tembu meh. Ukai nya enggai deh mayar karan tiap bulan enti dibanding ke meli minyak kena masang injin api. Jauh lebih murah enti bisi karan. Tak limpang-limpang utai ke ditusui tu. Ngenang rega getah di menua din ke balat endar berega. Jam aku ke bisi di rumah din suba bisi ga buya enggau sida indai nangkal tang enda ulih bejarit hari laban hari ke selalu runtuh. Bengat nadai alai nurun laban hari selalu ujan. Kejang aku din suba bala orang meli getah RM9+/kg. Ni enda idup endar bala Iban di rumah panjai enti rega getah selalu bakanya.
Lebuh kemisi nya suba aku mega bisi buya enggau orang gotong-royong nampal jalai semin ke belubang. Jalai nya suba projek diberi petintah. Terima kasih ga ngagai perintah. Tang diatu pendiau (condition) jalai nya enda tentu ngemuas ke hati bala rayat rumah panjai laban ke nyau mayuh udah belubang. Ni enda belubang, ukai nya mina kerita biasa ke nunjan jalai nya. Lori brapa tan enda kini pan nengah nya ga. Lori bala apek ke meli getah pan nengah ja
lai nya ga. Nama ibuh enda jai ga tudah jalai deh. Ukai nya jalai tar baka highway nya. Mina jalai semin ti nadai diperati (monitor) bala sida engineer. Peneka hati nampik ke semin.
Meda bakanya, dia tuai rumah mai bala nembiak ke kena pegai iya berunding de
ka 'ngeripay' jalai nya ngambi ke manah agi lalu nyamai agi ditengah. Nya alai bala pan nadai ga mayuh jaku laban endan nemu nya buah runding ti manah. Nya alai kena lemai hari enam 14 ‎November ‎2010, pemulai bala ke nangkal getah, pengawa gotong royong pan la
lu dikereja. Nya ga penyamai diau di rumah panjai ke besambung perabung besambung temetung. Pengawa endang selalu dikereja enggau cara begulai mayuh. Pengawa berat pan nyadi lempung laban dipesaup ke bala mayuh. Nya alai, enda lama ga pengawa nya tembu laban hari nyau deka ujan lalu sayau ga ke semin enti kena tinggang ujan bedau rangkai. Mina muai semin ngapa. Jalai ke bedau kena 'ripay' nya diperambu deka 'diripay' ba hari bukai dudi hari ila. Di baruh tu sekeda ari gambar ke bisi diambi maya pengawa gotong-royong nampal lubang ba jalai semin niki ngagai Rh. Endawie di Ng. Grenjang kena 14 Novenber 2010 tu tadi.

Indai Munggau ngauk semin. Lelaki ke ngena baju adidas nya Tr. Endawie


Orang ke ngara ke semin nya Boy, baju burak cekak punggung nya Apai Na, ke mai kereta sorong nya George lalu ke megai sekup nya apai aku. Akih ke enda bebaju ngena tanchut celum nya Budu hero Ng Grenjang



Tuai rumah merati ke bala nembiak redak gawa. Mangah orang tuai tu. Enti salah lalu ditengkuk ya tunsang. hahaha

sekeda ari bala mandur...mian komplen ja sida tu nemu...hahaha

Taja gamal mit, tang gawa bebendar tudah...


Saga (enda bebaju) ft. Indai Munggau bebendar ngauk semin..

Jematan diempang ke kayu kena nagang orang ke bisi kerita nengah jalai ke baru udah 'diripay' laban semin agi basah

Gambar rumah dipeda ari puting jematan jalai niki ke rumah panjai. Kawasan rumah repa lalu beguna ke kerja gotong-royong nebas serta mancit rumput...

Gamal jematan lama ke mina jadi pengingat aja...di baruh tu iya nya Ai Krian lalu ulih dipeda ba ili nyin iya nya Ai Grenjang ke mati ba Ai Krian ke lalu nyadi nama rumah panjai...gamabr ari ili jematan baru...

Gambar Ai Krian mega tang gamabar diambi muak ke ari ulu jematan ke baru


Gambar Rh. Endawie dipeda ari tinting bukit ke ulih alai talipun di Ng Grenjang..bukit ba tinting kebun lada sida apai

Gambar anak raja (rainbow) ke diambi penguda teduh ujan mual ke ujung tanju...bisi dipeda ditu mega iya nya pucuk rian di tebing Ai Krian

Rampa menua tunga ke ujung tanju...menua bedau kusi lalu bisi dipeda ba gambar tu iya nya pun pantu...kira enda suntuk lauk maya bisi pengawa...asal bagas bisi aja pantu diupa