Sempama Iban

Bansa Iban endang sigi tebilang engau adat, jaku, main asal enggau pengawa rama. Ambi ke banding, aki ini kitai kelia cukup pandai amat bejaku sereta landik amat ba penemu rama baka jalai beburung, bumai enggau pengawa bukai. Nyadi ke kelia utai tu endang sigi nadai ditulis ke ba bup dikena ngingat nya alai sida ke tuai menya mina nyabung penajam pengingat aja ke ditampung turun temurun. Nya alai tak salah amat munyi jaku seleka nyangka utai ke ditampung sida ke tuai nya tau lain sereta bebida ba batang ai siti-siti laban nya mina bemalin ke pengingat sida ke tuai aja ke lalu ditusui ngagai anak telesak ambi ke bisi dikenang dudi ari. Nya alai kitai ke rebak dudi tu patut amat bisi penyedar ke utai ti bansa tu. Beduduk ari kitai ke bisi sekula lalu nemu macha sereta nulis nya alai ngena amat enti utai ke baka tu bisi ditulis ke simpan lalu bisi ke bacha sida ke rebak dudi ila.

Beduduk ari penyedar nya tadi dia aku lalu nguji deka nulis ke utai ke mengga mit nya ba blog aku tu. Penemu aku sigi kurang, enda chukup mayuh enti disbanding ke enggau orang bukai tang laban dibai ati ke sayau ke bansa diri nya meh aku lalu nguji nulis ke utai tu. Utai ke deka dikenang aku diti iya nya siti ari pengaya jaku kitai bansa Iban iya nya sempama. Nyadi utai ke dikumbai sempama tu iya nya genteran jaku ke suah dikena kitai manding ke pengidup, pendiau enggau ulah kitai mensia. Utai ke alai manding ke nya baka jelu, utai tumbuh, gaya idup, enggau mayuh agi ti bukai.

Nya alai sebedau aku ngerintai ke sekeda sempama ke ditemu aku, dia aku enggai enda minta ampun ngagai bala mayuh nyangka sempama nya tadi bisi salah sereta enda ngena ba ati kita. Kita tau meri komen kita lalu madaah ke penyalah ngambi ke aku ulih ngemetul, nyeruri sereta nyeleti iya awak ke tau betul.

1. Baka pipit deka nelan leka embawang

- pipit tu sebengkah burung babas ke suah ditemu kitai ba umai, kebun lada, sereta temuda. Bulu burung pipit tu chelum lalu bisi ga banda lalu yak e banda nya lalu dikumbai pipit banda. Pemakai pipit iya nya padi.

-embawang tu sebansa buah babas. Enti iya agi mata buah ya masam tang enti udah mansau isi ya bebali nyadi kuning lalu manis diempa. Buah embawang tu besai lalu tau bulih sekilo pemerat sigi-sigi.

-reti sempama ke dikumbai orang tuai baka pipit deka nelan leka embawang tu iya nya dikena manding ke ulah orang ke deka ngereja pengawa ke enda ulih tangkup iya empu. Kira ke pengawa nya ending tetap enda ulih ditapi iya ketegal ari pengurang penemu, pengelandik tau ke pemandai iya.

-chunto ayat:

Balat ga Unggang nya tak ngumba-ngumba ka enggau orang kereje ke tasik, ukai nya nemu macha. Nyangka nya meh utai ke dikumbai orang ke tuai baka pipit deka nelan leka embawang.

2. baka ukui nengkadah linau

-kitai semua sama nemu jelu ke dikumbai ukui tu. Bisi sekeda ai nyebut iya uduk.

-utai ke dikumbai orang linau tu iya nya dagin jelu baka babi, kijang, enggau rusa ke disalai awak ke tan agi ditaruh.

-reti sempama tu iya nya dikena manding ke kitai mensia ke ngembuan pengingin ati ke utai siti-siti tang endang sigi nadai jalai tulih ke iya ketegal bida pangkat, pemandai sereta tingka derejat kitai. Ambi ke banding, tudah ukui mina tak nitik liur aja meda linau tang nadai jalai ulih makai nya laban ke ditaruh tinggi ba atas para.

Chunto ayat:

Pengeran ati Wat ke Jati sigi bendar tang laban tudah tuai orang seranta lalu sida Jati orang kaya nya alai sigi nadai jalai meh seduai iya ulih jadi ila. Sempama baka ukui nengkadah linau meh tudah Wat semina buya mata meda aja.

3. baka empeliau bedua iku

-empeliau tu sebengkah bansa jelu kampong ke siga. Kira sida tu sama species emnggau kera meh laban sida ke sama jelu jangkit. Diatu empeliau nyau nadai mayuh agi kaban nyau deka pupus. Nitih ke jerita tuai, kelia iku jelu empeliau tu panjai tang laban ke udah dibagi iya enggau jelu bukai nya lalu ngujung ke iku iya nadai sampai ke saritu.

-reti leka sempama tu iya nya dikena nyema ke orang ke kelalu manah ati tau ke murah ati (generous). Sida sanggup meri pemisi sida ke orang bukai ke beguna ke tulung tau ke bantu lalu nadai ngira diri rugi. Mimit sama dibagi mimit ga amat ga orang bukai sama bela ampit.

Chunto ayat:

Amat cukup manah ati Igat nya, semua sida serumah diberi ya injin api siti sepintu lalu nadai ngira diri rugi enda nyalah-nyalah baka empeliau bedua iku ku orang tuai.

Naka tu dulu kenang aku ke sekali tu ba senentang sempama kiatai Iban. Dudi ari ila ga aku nambah ke sekeda sempama bukai ke bisi ditemu aku. Nya alai aku sekali agi minta ampun enti nyema utai ke ditulis aku nya salah.